بسم الله الرحمن الرحيم       صلوا على المصطفي يا أهل بلدي يا أهل الوفا انسوا اللي فات و كفايه قر و حسد و مُناكفه قاعدين و عنيكم علينا تنقروا و احنا طالبين الشفا دا السم تحت اللسان يا ناس وحنا ناس متلهفه   لقينا الدنيا غابة عايشين مع الديابه لا بترحم الغلابه و الناس الطيبين   قلنا و احنا مالنا ساكتين و مش ف بالنا المكسب اللي جارنا من كل المحرومين   قلنا فراخ بنقلي و كفته كمان بنشوي و ف سندوتش نحشي و نبعها للجائعين   كله أمن غذائي نفتح ف حي راقي و لا ف مول تجاري مطعم المتطلعين   أو حتى مدارس تمني اللي دارس بشهاده و هو جالس حلم الكسلانين   و شويه و تبقى جامعه لخلق موش ممانعه تتورنش و تبقى لامعه و احنا الكسبانين   و لا نبيع أغاني بكلام مالوش معاني يروق كل القناني للناس المسطولين   بيها نعمل مسابقه بالهاتف الحل يبقى سهل بدون مراقبه يكسبها المحظوظين   نشوفكم محتاجين لإيه دولار و يورو فيه بسعره راح نشتريه يغلوا هوب بايعين   و بكره عماره نبني لشركة أنا و إبني أرضها كانت بتجني محاصيل للآكلين   يسكنها ناس ف غربه لموا فيها هبره ناخدها بدون مكابره لاتحاد المالكين   عليها مليون مخالفه و قضايا تملى قفه و ندفع بدون معافره لمسؤلين متسجدين   ف حكومه عماله تشجع مستثمر بس مجدع من جيبه لا بد يدفع اكرام العاملين   دا احنا ناس بنشقى و انتم ناس بتنسى و لا تعرفش تقسى و ف عسل نايمين   غلبناكوا بالشطاره حتي بالأماره إنتم ساكنين ف حاره و احنا ف المهندسين   ليه بقى تحسدونا على رزق كتبه لينا المولى اللي فوقينا سبحانه رب العالمين   صلوا على المصطفي يا أهل بلدي يا أهل الوفا انسوا اللي فات و كفايه قر و حسد و مُناكفه قاعدين و عنيكم علينا تنقروا و احنا طالبين الشفا دا السم تحت اللسان يا ناس وحنا ناس متلهفه   أبو حميد المصري                  © Ahmed Tabbakh 2003