بسم الله الرحمن الرحيم

كلمتين في العضم قالهم       عم عايدي بتاع الفـــول

لو ما كنتش منه سمعتهم           مكنتش فهمت معـانى القول احنا ناس دايما مطاوعينهم           طابور ماشي حذا على طول
 
 

بعد ما صرنا على قد ايدهم   صار كل شيء عندنا مقبول

واللي منزلين اديهم مننا     ح يرفعوها لما... يغلى الفول

قال لك ايه عم عايدي ؟        قال اللي ف قلبنا كاتمين

بعد ما شفنا أهلنا بتندبح     و ديتهم كلمتين حامضين

مره ف سته و خمسين      و مره في سبعه و ستين

حد سأل حد افتكر ليه       راحوا الغلابه ف الحربين؟

دا حتى احنا نسيناهم         و نسينا تارنا عند مين

تارنا عند عدو الوطن     و لا عند ال .. مسئولين؟

بعد ما مشينا وراهم       بقيوا صحاب قوي لتنين

حاضنين قوى بعضهم    حبهم تنطق بيـه العين

تقول يا دمهم .. كأنهم    أصدقاء أوفياء يا زين !

و من ثقل ظلهم اتبادلــوا مع بعضهم بوستين

زعق عليه جدع بيمســح في صحنه آخر لقمتين

موش كلامك دا يا ..... عم عايدي دا كلام خاينين

دي سياسه يا عمي ..... كنت انت من السياسيين ؟

العيش اللي بناكله ده من عندهم بدونه نبات جعانين

بص له عايدي بقرف     و حدف له حزمه جلاوين

و من عبه طلع لفه     فيها حجاب و ميداليتين

واحده نجمة الشرف    اللي كانت لأبوه حسنين

اللي راح يحارب العدو و مرجعش من فلسطين

و الثانيه قال دي بقى   ليا .. ثمن رجليا الإثنين

ساعتها عرفنا ليه عايدي دايما قاعد و احنا واقفين

دق البروجي وقتها نوبه ندا قام الجدع و معاه نفرين

يجروا على بوابة القشلاق اللي على جداره مسنودين

بص لهم عايدي بأسى وقال و في عينيه باين دمعتين

تاري معاكم إنتم .. بس فين اللي يرجعكم لنا سالمين؟

يحميكم لأهلكم ربنا و لا أشوفكم أبدا قعدتي قاعدين !

أبو حميد المصري