بسم الله الرحمن الرحيم  من زمان و أنا أصرخ أنادى الأخ أوع تمشي وراءهم و تقع في الفخ لا تعطي ليهم أذن لحسن سمهم ينبخ ف عروقك و تنسى إن أنا لك الأخ يا ليتك صدقتني قبل ما العيار ينطخ   خافوا لحسن في يوم عوز ألاقيك تمد إيدك ليا و أمد إيدي ليك يوم ما وقفنا سوا قال العدو يا فكيك من بعدها عرفوا انه يلزم لنا التفكيك و في إخلاصنا لبعضنا ينزلوا تشكيك و نصدق كدبهم لكي لا تثق في أخيك  دول يا أخي استكثروا الخير فيا و فيك !   بعدها خرسنا كلنا و نسي الأخ أخاه نسينا الكلام كلته حتى قولة الآه و أتلهى كل مننا في عالمه و دنياه و راح مننا عزنا و فخرنا و الجاه لما انكسر فينا قلبنا الذل أهو شفناه و كل اللي آمنا به حتى الأمل نسيناه    و بقينا كلنا أتباع لغريب من بلاده جا   منحناهم كل الثقة و لهم كل الميزات يدخلوا البلاد على كيفهم بدون تأشيرات مرة للسياحة و مرة لجذب الاستثمارات أما دول يا سيدي سلك دبلوماسي و سفارات والحقيقة إنهم كلهم جواسيس و جاسوسات   و بينا و بين بعضنا ندقق في الفيزات لحسن نكون جايين ندبر لبعضنا انقلابات   علمونا العيب و العيب أصبح في وسطنا ساكن ينشروه بيننا عملا و مستغربين و عدو ماكن حجتهم إنهم بينوروا فينا و في مخنا الراكن ليزيدوا من يأسنا و نشيل على رأسنا طاجن و يعلمونا إزاي نحدد نسلنا و يقل عددنا لكن هما يزيدوا في العدد و منهم يصبح لنا حاكم يأخذوا خيرنا و كل واحد مننا يصبح لهم خادم   يا ترى اليوم راح يفيدنا الكلام  بعد ما تكاثر علينا الأكلة اللئام و سرى سمهم في الدم والأجسام و ضاعت ما بيننا صلات الأرحام لا ... الكلام وحده لا ينفع الإنسان لازم يكون الأمل في الله و في الإسلام نطهر به نفوسنا و يشيع بينا السلام و ينصرنا ع العدو و نحرر الأوطان   بسم الله الرحمن الرحيم   الدنيا فانية و الزمن دوار حكمة بنقولها ليل و نهار لكل الناس و لأبعد جار كلام صحته تثبته الأخبار   سمعت اللي حصل لفلان كان صوته يزلزل البنيان و نظرته ترعش الأبدان و بقوته يكسر الأسنان   مستقوي بصحته و متحامي ف شلته ماشية كلمته و اللي يعارضه يسكته متباهي بهيئته و دايس عل ف سكته كل حته حتته مافيش أوسع من ذمته   ملمومه حواليه ناس جبارين عتاوله تمجد و ترفع في قدره بمقدره هايله تقول كل حاجه إلا الحق موش قايله بكدبهم يقدروا يوقفوا المراكب السايره   كان في الأصل راجل زينا إنسان كل غرضه و همه انه يساعد الغلبان بمكرهم و لؤمهم و بالزن على الآذان لفوا دماغه و حاوطوه في كل مكان   ما تقدرش توصله و عن ناسه عزلوه الخطر عليه في كل مكان كده فهموه احنا ناس أشرار و هما اللي بيحموه و علشانه كل من اتجرأ نطق سجنوه   دا كلامهم ليه وكل اللي من قبله سبق نفس الكلام ح يقولوه لكل من بعده لحق و اللي يكشف كدبهم يحاكموه و يتشنق و العدل في الحيط يخبط راسه ينفلق   و بعد ما كان عادل و مشكور بقى ديكتاتور ما أعرفش معناها ايه أصلي ف السياسة تور اللي أعرفه إنهم حطوا ما بيني و بينه سور و خلوني أدعي عليهم و أتمنى إنه يغور   مرت الأيام و السنين بينا و بيه و ف يوم سمعنا خبر صحينا عليه فلان راح ياناس و الله زعلنا عليه و قلنا الله يرحمه و يحسن لوالديه    أبو حميد المصري      الثلاثاء, 07 أكتوبر, 2003     © Ahmed Tabbakh 2003