بسم الله الرحمن الرحيم   الغربه صعبه كلام صحيح طلع يا ناس مايعرفش قسوتها الا اللي جربها   الغريب خيال ماشي وحده ما بين الناس قلبه هناك مع أهله ف حاره غادرها   فرحته دمع في ليل و الدمع احساس شوق و ضحكته رسمه بيرسمها     يوم ما يرجع للوطن يرتبك يحتاس يبوس ترابه و لا الحارة يجريلها     هناك الكل قاعد مستني الحبيب يرجع و هديه في شنطة شايلها   حاله بقى معدن أكيد مليان الجيب ينوبهم من الحب جانب و يعدلها   بعقد لم ينساه لكل نسيب و قريب يشتغل و ياه في بلد كتر خيرها   ما هو عليه واجب و قدر و نصيب أصله بيحبهم و لقمته بيقسمها       جري ع الموقف يلحق له تاكس وقف له اسطى و شنطه حملها   ركب و قاله بسرعه ع المكس وحشاني شوارعها و دكاكينها   عينيه في كل مكان تبص تمس جدران البيوت بناسها و رصفانها   شاف البحر بعيد و سمع حس الموجة فتح شباكه يشم نسايمها     دخل الحارة و العيال بتتشعبط تنادي حوده وصل و شنطه جايبينها   حاسب السواق اللي طلع لبط طمع ف قرشين زياده حاجه عارفينها   طلع يجري موش مهم الجاكت يتحك ع السلم في حيطه طازه داهنينها   ف حضن أمه إترمى بصوت بيعيط إيه اللي حصل حوده أول مره تعملها؟     إخواته اتلموا عليه و على الشنط دا يحضنه و يبوسه و شنطه فاتحينها   جبت لي ايه يا خويا دا نا دابحه بط يقلبوا فيها و هدومه براها رمينها   فتشوا كل الشنط و الكل قعد إنبط لما لقوا ما فيش حاجة فيها لهفينها   مال عليه نسيبه الغطاس ع الشط و ف ودنه همس قاعد ولا أجازه واخدينها     رد حوده بأسى لأ خلاص فيه حرب كل اللي معايا خدوه الا الهدمه لبسينها   دى عدتي جبتها و كمان ما فيش عقد ح أشتغل تاني ف بلدي نعمه ما حسنها   قومي يا نظله مع العيال ناكلوا البط هم نسيبه يشد مراته من ايدها يقومها   دار تاني لأمه يحضنها غريق وصل للشط وبحنان الأم طاب خاطره و بقبله على جبينها           أبو حميد المصري           © Ahmed Tabbakh 2004