بسم الله الرحمن الرحيم

أم السعد لها الف عيل ربيتهم

موش أمهم صح لكن أم راعيتهم

دادة سموها و حبوها و هي حبيتهم

من أربعين سنه بدت قصتها وياهم  

كانت في الأصل ست بيت شرقية

 الخلفة منى عينها و رغبه مخبية

و الشوق للأمومة حاجة عادية

لكن ربنا كان له حكمة مخفية  

جوزها أمين بعد طول انتظار للعيل

زهق و اتجوز يمكن العيب يكون منها

دارت جرحها و الجرح لا ينام ولا يقيل

قالت ابنه يكون ابني و لو كان من غيرها

ضرتها يا ما عايرتها لكن صبرها خلاها تتحمل

و كل ليلة تبكي و للعجب كانت تدعيلها

و الزمان ما له أمان و الحزن لقلبها إتسلل

و زاد حزنها لما أمين  فجأة بموته فارقها  

الضرة رجعت لأهلها و الدار عليها خوي

لا في أب يرعاها و لا في أخ يتحملها

خرجت تدور على لقمة عيش متوكلة ع القوي

دلتها جارة لدار أيتام فيها شغلانه تشغلها

قابلتها المديرة بترحاب لما شافت الطبع سوي

و بدأت الدادة أم السعد بالخير رحلتها

تصحى الفجر و تجري تشوف شربات و علي

 علي يدوبك كان مشي و شربات في لفتها  

في الليل تسمعها تهدهدهم

بحنان ف قلبها كله ليهم خرج

و الصبح تلقاها تهشتكهم

كانوا لها الإتنين العوض و الفرج

وزي ما دخلت في قلبها محبتهم

حبوها بلا خوف و لا حرج

وكل العيال التانيين حبتهم و ربتهم

محمد و سعاد و كريم وأمينة و فرج  

و سنه و را سنه و تعدي الأيام

و أهل الخير شيمتهم كفالة الأيتام

يتبرعوا للدار و يكبر البنيان

و يكتر معاها البنات و الصبيان

و تكبر أم السعد زي كل إنسان  

و في العيد رحت زي كل الناس

أعيد على نزلاء الدار و أتبرع بقرشين

لقيت الهدايا هناك أكداس أكداس

لأم السعد منها ييجي كده التلتين

و حوليها عدد كبير من الناس

سنهم من ييجي سنه لخمسين

يحضنوها و إيديها بتنباس

ينادوها يا أمنا يا نور العين  

كل ما تسأل أحد  منهم انتم مين ؟

يرد نفس الرد و هو منشرح مبسوط

اسمي علي عندي محل عجل و جنوط

و دي مراتي شربات ست بيوت

و بنتي أم السعد و ابني... أمين

أبو حميد المصري