بسم الله الرحمن الرحيم

صوتي إنحبس ليه يا ناس ما تسيبوه

خمسين سنه في صندوق خبيتوه

مفتاحة كان معايا و بالغش أخذتوه

و بالشمع الأحمر و في الضلمة ختمتوه

 دا صوتي أنا و انتم صادرتوه

أقول لا .. تهتفوا و تضيعوا

صوتي في زفة كدابة

أو جنازة تتلموا تشيعوا

فيها وطن بأغنية و كتابة

و لا .. تختفي و نعم .. تلمعوا

في ندوة شعر و خطابة

أتاريكم نعم ب تشجعوا

أما لا .. عندكم محتاجة ندابة

لا.. صارت آه .. ليه تستعبطوا

ما نعم هي آه .. في لغوة الغابة ؟  

كل يوم أقول آه و انتم ما بتسمعوا

كل آه مني تاخدوها و تفلسعوا

الآه نعم .. و نعم قبلها آي..  تجمعوا

في جداول و ببيان نتيجة تطلعوا

ب بجاحه عن كدبكم لا ترجعوا

كله استفتاء نزيه و حرة يا انتخابات

لتظلوا باركين علينا حتى الممات

صوتي أمانة عندكم  تحت  الحراسات

تحرسني من نفسي و من التفاهات

دي  شي و حا و  هس أسهل الكلمات 

عطوة ابني قال راح أطلق أنا صوتك

قلت من خوفي ناس من زمان سبقوك

ماتوا لأجل صوتي يتحرر و معاه بيتك

صرخوا لأ في وجه حكام كتير و ملوك

حمل فأسي و قال ح أحرث أنا غيطك

و أزيل دود الأرض و أكسر الصندوق

الغيط ح أزرعه خير و أحرس هناك صوتك

صوتك إتحبس بعد ما أنت في الخوف حبسوك

أبو حميد المصري